大家去學每一樣新事物，必然會經歷唔同階段。過程中將會面臨挫折，以及挫折後隨之而來既批評與目光。
特別係爵士樂，要求於一分鐘內即時創作一分鐘既音樂。創作既音樂既要合乎邏輯，又要不流於俗套，的確會為表演者帶來巨大壓力。壓力帶來挫折，挫折又會帶來壓力，就會令我們跌入負循環，越來越沒有自信。最終認為自己從一開始就唔係爵士樂的料子，自暴自棄。
要克服呢種心理層面既恐懼，令自己能夠熱衷於自己所愛既音樂，我地需要係腦海中建立一種思維模式，以防止自己跌入無盡既漩渦之中。
我試下將每一個人比喻為一部電話。一部電話既功能好壞，主要靠兩大元素：硬件同軟件。
硬件包括CPU, RAM, 螢幕, graphic card, sound card etc… 比喻返人類，就好似我地既智商，天份，心智，性格，領悟力等。而軟件方面，就好似個ios同apps咁，比喻返人類就係經驗，技術，同知識既累積。
當我地表演後覺得好沮喪，可能腦海中會出現以下既聲音：
1）我真係彈得好差，可能我就係唔適合呢樣野
2）人地唔練琴都彈得好過我，我一定係無天份
3）我已經盡左力去練，但係都做唔到個要求，我本身學野就係慢
4）我次次上台都好緊張，我本身個性格就係唔適合表演
以上既想法，都係你好真實既切膚之痛。但係呢啲想法，都有一個弊病，就係將失敗歸咎於你無可改變既先天性條件！呢種想法係toxic既，佢將會慢慢饞食你既自信，長年累月將會徹底毀滅你！
一個健康既想法，就係將失敗歸咎於可改變既因素，即係歸咎於軟件。累積得未夠多經驗，技術同知識，係失敗既主因。呢種想法將會將失敗轉化爲動力，推動自己去投放更多時間精力去進步。
當然可能你會問，如果真係我本身既天份，心智不足導致我失敗，咁樣咪對錯症狀？同自欺欺人有咩分別？
其實從最理性，邏輯既角度思考，我地無可能斷言到具體係咩因素導致我地失敗。究竟應該歸因於硬件定係軟件？可能只有上帝先清楚。也許最真實既答案係兩者皆是。
既然歸因於硬件或軟件都係不完全正確既，我地不妨選擇一個對我地有幫助既思維模式。認為自己經驗不足，會去多啲jam。認為自己技術唔夠，會花多啲時間練琴。認為自己知識唔夠，會學多啲樂理。
教育學者會將認為軟件係失敗原因呢種想法，定義為成長心態。而將認為硬件係失敗原因既想法，定義為定型心態。成長心態，其實都係一個大話，但係係一個好有用既大話。
或者天份，性格，領悟力真係會影響我地彈爵士樂既能力。但當我地可以武斷，狂妄，自大甚至自欺咁同自己講：“係未夠經驗姐！”，我地絕對可以比自己天份高既人成長得更快！
呢個世界極少數人係天才，同時極少數人係笨蛋，我地大部分人都係能力相約既大眾。我地之間既分別就好似iPhone 13同iPhone 14；都唔知有咩分別！最重要唔係部手機咩model，最重要係你有無update ios ;)
Love you ❤️
