當有流行樂演唱會舉行時，經常喺社交媒體會見到類似嘅留言：「竟然聽唔到XXX（歌名），想𠝹櫈」「XXX演唱會版改編到咁，哂咗首歌」。
好多朋友仔喜歡聽到熟悉嘅旋律，配合熟悉嘅編曲。去演唱會，就係想聽到原汁原味。熟悉感，會勾起回憶，會有共鳴。呢一類人，喜歡聽到「已知」嘅音樂。
而有趣嘅係，無論大家係三十，五十，定係八十歲，覺得熟悉嘅，有共鳴嘅音樂，大部分都來自十幾至廿幾歲呢段時間聽嘅本地音樂。過咗呢段歲數，通常都會覺得其他音樂「唔明做緊咩🤷🏻♂️」。
另一部分朋友，反而喜歡尋找未聽過嘅音樂類型，歌曲，歌手。不停聽同一系列嘅歌，對佢地嚟講係一種懲罰。佢哋會覺得好悶，好predictable。
即使尋找未聽過嘅音樂唔會每首都喜歡，但係尋找嘅過程，係一個了解自己，了解世界嘅過程。尋找未知，係佢地樂趣嘅來源。呢一類人，喜歡「未知」嘅音樂。
佢哋會嘗試代入創作者既世界，會幻想：如果呢首歌係我作嘅，我係一個點嘅人呢？我過緊一個咩生活呢？我喺點睇呢個世界嘅呢？
對呢班人嚟講，聽歌就好似短暫地去咗個旅行，短暫地換一個視覺睇世界，短暫地同一個陌生人傾下計。
享受「已知」，「有共鳴」嘅音樂係被動嘅，坐係度㩒個play制，就已經可以好爽。相反地，通常要享受到「未知」嘅音樂，需要主動去感受，思考，甚至要上網搵下資料，了解下個音樂人，創作嘅時代背景，先會更實在地享受到個音樂。
講遠少少，我地其實冇得揀喺邊度出世，咩時代成長。如果我地只「喜歡」十幾至廿幾歲時候聽到嘅本地流行音樂，咁究竟係我地自主地喜歡，定係無意識地接受時代環境嘅餵飼？🥹
你係邊種聽音樂嘅人呢？好可能係both。但係，你又想做邊種聽音樂嘅人呢？
文： @1fool1cub__
