細個開始玩instrumental，已經會比姨媽姑姐，中學同學問：點解冇人唱歌嘅？點解個intro 咁長嘅？冇歌詞，首歌講咩架？點解剩係玩純音樂，唔玩音樂嘅？
一般大眾比我有種感覺係，玩instrumental，係奇怪嘅，係搞搞震嘅，係無法產生共鳴嘅。
藝術創作，其中一個重要要素係忠實地表達自己（有興趣了解更多嘅，可參考之前出過有關李小龍嘅post🙏🏽）。有時候，音樂人選擇用instrumental 去做音樂，係因為instrumental 比起有歌詞，更能準確，直接地表達到自己嘅自己嘅情感。
舉個例子，我想表達我係醫院收到屋企人病逝消息當下沉重嘅感受。如果我係歌詞中好直接寫：「我好沉重」，其實你可能未必好代入到我當時情緒。你反而可能會好似counsellor 咁，只想理性地擔當安慰者嘅角色，而非代入我嘅情緒。
如果我婉轉啲，喺歌詞中寫：「微弱的街燈，沉默的氣氛」（我亂咁作的🤣），可能你反而會代入到更多。個橋妙係我賞試用模糊嘅意象，去誘發你幻想。幻想自己設身處地係呢個情景入面，會有咩感受。你未必會即刻講到「哦！你想講你好沉重！」，但係喺幻想嘅過程當中，可能你已經比我無形中拉左入沉重嘅氛圍入面。
然而，「微弱的街燈」，幻想嘅可能性依然有所局限。因為當我指明左係「街燈」，你腦海嘅畫面就無可能冇「盞燈」喺入面。因而聽衆代入嘅空間會被壓縮。
文字比起聲音，始終比較有明確嘅指向性。要用文字，去完整地傳遞一段經驗，一份情感，係好唔容易既事情。
音樂其中一個重要功能，就係比較容易能作為完整地傳達感情嘅載體。如果我想表達喪失親人嘅沉重感，我可能會喺部Grand Piano上，踩起個sustain pedal，然後用指甲大力刮落最低音，最粗嗰條弦，發出「轟」一聲。然後由佢慢慢die down，直至寧靜出現為止。
一粒音，蘊藏嘅情感，可能比一份歌詞更豐富。聽者亦可以繞過思考，直接接收聲音帶來嘅衝擊，再自動將自己嘅經歷代入，嘗試感受音樂人經歷緊嘅感受。
所以，音樂人唔寫歌詞，唔係想懶高深，想你唔明。相反，其實佢只係想傳遞到最真，最完整嘅情感比你感受。
有文字可能會令你覺得啲野易明咗，但係文字，有時反而會令你睇唔到最真嗰樣野🙏🏽❤️
文：Bowen Li