「囝囝你睇下，哥哥吹緊喇叭呀😇」
如果你問人佢聽Jazz鐘意咩管樂手，佢可能會話係John Coltrane、Paul Desmond呢啲色士風手，再識野多少少可能會講小號手Miles Davis、Chet Baker、或者係上回嘅主角Lee Morgan，但有一個管樂，喺爵士樂嘅世界，由開天闢地early jazz開始己經存在，但係好易被世人遺忘 ------ 長號Trombone。而今次講嘅就係Swing Era嘅大紅人長號手—Glenn Miller。
佢出身嘅故事都正正常常，玩下美式足球，高中靠搾牛奶賺佢第一支Trombone，玩School band，1921 年高中畢業之後想做全職樂手，為左表演Miss左自己個畢業典禮，大學讀音樂係咁走堂做gig，樂理肥佬，都普普通通冇乜特別。
Glenn Miller 周圍玩gig，早期嘅時候已經開始同一啲後黎好出名嘅紅人Benny Goodman、Coleman Hawkins等等表演同錄音。
到左1938年 ，距離佢立志要做樂手已經有十七年，佢組成嘅big band 開始獲得商業成就。1942年憑Chattanooga Choo Choo 一曲賣到第一張Gold Record（至少五十萬銷量）。1942年正係第二次世界大戰，非常戲劇性地Glenn決定喺佢事業最高峰嘅時候，放棄佢極度高薪嘅音樂事業（計番通漲大概一星期賺港幣二百五十萬)，立志參軍用音樂去幫助當時嘅美軍。因為佢38算係高齡，需要戴眼鏡同已婚，所以第一次報海軍冇收到佢，不過佢唔放棄，後來成功加入空軍。本身就係成功音樂人嘅佢，喺軍樂上當然都大有成就，佢將當時嘅軍樂隊現代化，組成Glenn Miller and the Army Air Force Band，風格貼近番當時流行嘅Big Band（因為都係佢搞嘅😂）可惜天妒英才，升到上少校嘅Glenn喺1944 年遇上空難，下落不明，終年40歲。
Glenn Miller 嘅歌膾炙人口，本身認識佢嘅朋友都知道我一定會講In The Mood，因為好多香港人其實都聽過。 1992年起，港台長壽節目瘋show 快活人用左呢首歌作為開場，沿用至今。歌手林子祥亦喺85年將佢改寫成歌曲《誘惑》。呢首歌中間最signature嘅一段，其實都係based on 一首early jazz嘅歌叫Tar Paper Stomp，所以有好多時創作都唔多唔少會互相參考下。
當你想同長輩介紹爵士樂，而佢又完全唔知你講緊乜嘅時候，不妨播下In The Mood，問下佢以前香港係點，佢地會發現自己認得個旋律然後覺得你係一個有學識嘅好寶寶。
