「」鬼才Bass手Charles Mingus
有夾開Band 嘅都知，一Bass 難求， bass 手嘅好壞為音樂整體感覺帶黎結構性影響，但係佢地永遠喺後面做背景，甚至乎從來唔聽live 嘅聽眾連有呢部分都唔知，可能因為咁，好似好似好似好多bass 手都有啲憤世嫉俗，但又有夥包容世人無知嘅佛心，非常矛盾嘅心境。今日想介紹一個Bass巨匠Charles Mingus， 人稱「The Angry Man of Jazz」。
Charles Mingus 身世複雜， 生母係中英南美混血，生父係黑人瑞典人嘅混血兒，喺Mingus嘅自傳提到，呀爸出世畀人當白人湊大，直到14歲先知呀爺原來係黑奴，被逼離家出走，癲過韓劇。
可能屋企比較保守，媽咪淨係准屋企播教會相關嘅音樂，但係生性反叛嘅Mingus偏偏鐘意聽Jazz，特別係Duke Ellington。Mingus其實一開始最鐘意係拉Cello(大提琴)，但係因為家境貧困同埋佢嘅種族，注定同古典音樂教育冇緣，而Cello亦唔係一個容易被爵士樂接納嘅樂器，所以最後轉左做玩double bass，即係低音大提琴。
被認為係Bass嘅神童，Mingus二十碎就開始跟Louis Armstrong搵食，後黎又成日同Charlie Parker玩gig。 1953年，三十有一嘅佢終於有機會入到偶像Duke Ellington嘅Big Band，但係因為有一次佢覺得份譜寫得太低音，私自玩高八度，畀坐前面嘅白人長號手Juan Tizol串:「唉~同隊Band其他Niggar一樣唔識睇譜」之後喺後台隻揪，畀Juan拎刀指住，最後Mingus畀Duke 炒左。
教會嘅背景，複雜嘅血統，被古典音樂拒絕，有才華但貧窮嘅悲憤，Mingus嘅音樂充滿住戲劇性，相當有性格。 佢好多編曲都好前衛，但又運用左啲好傳統嘅手法。例如，爵士世界入面有種玩法叫Collective Improvisation，即係全部管樂一齊即興，Dixieland時期先流行，聽起黎非常混亂，到Big Band年代已經冇人做，Mingus拎番呢個元素，成為佢編曲嘅一大主菜。
此外，佢都有啲歌會有黑人教會音樂同埋20世紀古典樂嘅元素， 集百家大成，有人形容佢係Duke Ellington 後最重要嘅爵士樂作曲家。
五十年代Mingus 係最高產量嘅時期，總共錄左三十隻碟，其中一個實驗性project 叫做The jazz workshop，好串嘴咁樣玩歌唔係派譜畀團員，而係要佢地靠聽咁逐首歌學。雖然實力高強，但mingus 唔係好show off 好多長solo 嘅bass 手，聽下聽下我會覺得，好似人地都係拎件樂器去玩即興，而佢係拎啲樂手黎即興。霸道又怪異嘅佢，喺1954 年出左一本玩味十足嘅小冊子，四段文字教大家點樣訓練屋企隻貓去馬桶大小便，佢控制反叛嘅爵士樂手玩到上哂癮，開始將魔爪伸向主人，聲稱三四個星期就成功仲要有圖🤣🤣(btw佢隻貓公叫Nightlife lol)(原文可以喺佢官網搵到lol)
Charles Mingus 驚喜作品無數，今次先畀大家聽下呢首the clown, 搞笑藝人Jean Sheperd 隨音樂即興獨白，原來1957年已經有咁嘅crossover！隨Post送上佢一啲CD封面, 留意下D 碟名真係好鬼中二病但又好似型型地咁, 關於Mingus仲有好多野希望下次可以再分享