「」成日覺得大家點樣遇到一首你鍾意嘅歌，本身就係一樣好可以娓娓道來嘅事情，因為音樂本身就係一個回憶嘅載體。所以今日我選擇左騎劫左呢個post 一邊聽呢首歌，一邊飲住威士忌，分享我點樣遇到呢首我loop左成個月嘅歌。大家可以開定支老威聽呢首歌(真心, 聽住呢個arrangement, 你飲suntory 都會好似Ardbeg咁好飲)，然後睇我呢篇潮文。
今個月，係某高級大酒店做左駐場樂手，本身成件事係好撈野feel，聽到都覺得悶，本身都諗住hea hea 地搵下錢算。 但係我遇到一位黎自蘇格蘭嘅vocalist （我先用G黎稱呼佢），唔知係咪真係住係小城市嘅關係，Ｇ完全冇明星架子，每次intermission都會同我地係咁講音樂嘅野，仲好有興趣咁想了解我同另一位鼓手嘅人生故事。有時，音樂就係咁奇妙，雖然我地唔係討論個首歌嘅本身點樣做好D，但係玩出黎嘅音樂就會自自然然愈黎愈好 ， 好記得岩岩出黎做freelance 有一位前輩飲到貓晒(不過佢都冇咩時間唔醉) 突然好認真咁同我講 ＂doing music is all about doing people” 我個陣都唔知呢句錯L 晒grammer嘅句子up咩。但係宜家愈黎愈明。作為一個local/asian/sideman/小薯 樂手，當有frontman唔當你係工具人而去了解你，你會感受到你係part of the music。大家都自自然然會去serve音樂本身，提出意見。而唔係serve 粒星, 去impress 佢，或者去satisfy佢。
仲記得，有一個星期，G 因為好嚴重嘅上呼吸道感染，成個星期都表演失準，個個星期完晒之後 係dressing room到喊，我個下唔知點解都會眼濕濕，我諗係因為Ｇ嘅音樂唔再係只係Ｇ自己嘅，所以Ｇ嘅失準亦都係我地嘅失準，Ｇ嘅無奈／掙扎都係我地嘅掙扎，只有咁先可以解釋到D眼淚係點黎。好彩去到往後嘅星期，Ｇ都大致痊愈，回復身手。去到最後一個星期，大家都玩得好開心，開心到每晚玩完去到１２點就冇尾班車，大家都留係dressing room吹水。到最後一晚，Ｇ就送左呢首歌比我地。
其實音樂唔係真係咁重要，人先係成就音樂最緊要嘅元素。
多謝你又提醒番我，多謝你，Ｇ
聆聽難度: 1/5 (基本你有耳仔，同威士忌就會享受到）
Ev'ry Time We Say Goodbye - Andy Bey & The Bey Sisters
文：爵士周柏豪 Nelson Fung
